柯展華（青蛙） - 成員介紹

樂手—柯展華（青蛙）

1 可否簡介下自己在HeArtz的角色和自己的音樂歷程？
我喺HeArtz度主要負責彈bass，暫時都未有咩其他實質嘢做緊
自己中學時喺教會學彈結他先嘅，然後因為教會冇bass手，自己又都幾鍾意bass，就開始咗彈bass。但真正學bass係入到大學參與浸大基督徒樂隊（BUCB），嗰陣認識咗bass老師（Vinc Chan） 先開始正式學習音樂。大學畢業後思漢同其他前輩都鼓勵我去進深學習音樂，就去咗美國讀一年音樂了。

2 對你來說音樂是甚麼？
音樂對我嚟講係認識同表達自己嘅一個方式。好多時會想聽某類型嘅歌去抒發下感受，又會被某啲歌詞或旋律吸引，係好好整理同認識自己情緒嘅時刻。然後又會好想自己都彈到呢啲有感染力／有故事嘅樂句去表達自己。

3 學習音樂或演奏錄音的過程中有甚麼難忘的事 ？
因為我哋多數嘅歌都係現場錄製，每次錄音都好難忘，要盡量keep 住每次都彈返一樣嘅嘢，一樣嘅energy 真係好難。

 4 對你而言，演繹詩歌會否有甚麼不一樣？
分別就不太大呀，我本身都比較留意其他樂手大約會做啲咩，然後盡量support隊band，覺得有需要填滿個空間時又會彈返少少lines咁，但彈詩歌時會更留意自己有時會唔會彈得太多，可能有時都要留返個空間俾聽眾。

5 對你而言，HeArtz是一個怎樣的團隊？
HeArtz係一個好主動，行動力又好迅速嘅團隊haha，大概由籌組到錄製完第一首歌都係好快手就搞掂，而且大家都好積極去邊學邊做，力求做得更好，呢點係音樂事奉上係好重要！

6 對HeArtz的發展抱怎樣的期望？
近年來都有好多粵語詩歌出現，好希望HeArtz可以成為教會揀粵語詩歌嘅一個選擇。HeArtz有自己原創，亦有翻譯詩歌同創作一啲短頌，希望唔同類型嘅音樂可以豐富更多教會對崇拜用嘅歌嘅想像啦～